Wednesday, December 30, 2009

நடிகைகளின் இரட்டை வேடங்கள்

நம் தமிழ் சினிமாவில் எம்.ஜி.ஆர். சிவாஜி, ஜெய்சங்கரில் தொடங்கி ரஜினி, கமல், விஜயகாந்த், அஜீத், என அத்தனை முன்னணி நடிகர்களும் இரட்டை வேடத்தில் நடித்திருக்கிறார்கள். கதாநாயகர்கள் இரட்டை வேடத்தில் நடிப்பது என்பது மிகவும் சாதாரண விஷயம்தான். ஆனால் கதாநாயகிகளுக்கு இரட்டை வேடத்தில் நடிக்க வாய்ப்புக்கள் அவ்வளவு எளிதில் கிடைப்பதில்லை. மிகவும் சொற்ப அளவிலே கதாநாயகிகளுக்கு அத்தகைய வாய்ப்புக்கள் கிடைத்திருக்கின்றன.

பொதுவாக நடிகர்கள் அனைவரும் எதாவது ஒரு திரைப்படத்தில் இரட்டை வேடத்தில் நடித்து விடுவார்கள். அதை எல்லா நடிகர்களுமே விரும்புவார்கள். அப்படி நடிக்கவில்லை என்றால் கூட, இயக்குநர்களிடம் வற்புறுத்தியாவது ஏதாவது ஒரு திரைப்படத்தில் இரட்டை வேடத்தில் நடித்துவிடுவார்கள். ஆனால் நடிகைகள்? யோசித்து பார்த்தால் கேள்விக்குறிதான் மிஞ்சும். எந்த நடிகையும் இரட்டைவேட கதாபாத்திரத்தை வற்புறுத்துவது இல்லை. அவர்கள் வற்புறுத்துவதற்கான வியாபார சூழ்நிலையும் அவர்களுக்கு அமைவதில்லை. இந்த முட்டுக்கட்டை நிலைகளை தாண்டியும் சில நடிகைகள் இரட்டை வேட கதாபாத்திரங்களில் நடித்து இருக்கிறார்கள். சில இயக்குநர்கள் அப்படிப்பட்ட கதைகளை அமைத்து இருக்கிறார்கள். இது கதாநாயகர்களுக்கான உலகம். அவர்களை சார்ந்துதான் வியாபாரம் என்று சுட்டிக்காட்டப்படும் தமிழ்சினிமாவில், அத்தகைய சில தடைகளை தாண்டி சில நாயகிகளுக்கு இரட்டைவேடத்தில் நடிக்க வாய்ப்புக்கள் கிடைத்திருக்கின்றது. தமிழ் சினிமாவில் அவ்வாறு இரட்டை வேடத்தில் நடித்த சில கதாநாயகிகளை பற்றி பார்க்கலாம்.

அந்தகால கட்டம் என்று எடுத்துக்கொண்டால் 1960 - 1970’களில் எம்.எஸ்.சுப்புலட்சுமி இரண்டு கதாபாத்திரங்களில் நடித்திருக்கிறார். இவர் "பக்த குசேலா" என்ற திரைப்படத்தில் இரட்டை வேடத்தில் நடித்திருக்கிறார். தமிழின் மிகச்சிறந்த நகைச்சுவை நடிகையான “டி.ஏ.மதுரம்” “பைத்தியக்காரன்” என்ற திரைப்படத்தில் இரட்டைவேடத்தில் நடித்திருக்கிறார்.

1970-1980 இந்தகாலகட்டத்தில் நடித்த சில நடிகைகளுக்கும் இரட்டை வேடத்தில் நடிக்கும் வாய்ப்புக்கள் கிடைத்தன. எம்ஜிஆர், சிவாஜி, ஜெமினி கணேசன் போன்றோர்களுக்காக இரட்டைவேட கதாபாத்திரங்கள் படைக்கும் வேளையிலும், நடிகைகளுக்காகவும் சில இரட்டைவேட கதாபாத்திரங்கள் படைக்கப்பட்டன அவற்றில் குறிப்பாக கன்னடத்து பைங்கிளி என்று ரசிகர்களால் செல்லமாக அழைக்கப்படும் சரோஜா தேவி “கலங்கரை விளக்கம்” திரைப்படத்தில் இரண்டு கதாபாத்திரங்களில் நடித்திருக்கிறார். நடிகர் திலகம் என்று சிவாஜியை குறிப்பிடுவதைப் போல், நடிகைகளில் நடிகையர் திலகம் என்று அழைக்கப்படுபவரான சாவித்திரி அவர்களும் “காத்திருந்த கண்கள்” படத்தில் இரண்டு வேடத்தில் நடித்திருக்கிறார்.

நூற்றுக்கணக்கான திரைப்படத்தில் நடித்து, நடிப்பில் பல உச்சங்களை தொட்ட அற்புத நடிகையான புன்னகை அரசி கே.ஆர். விஜயாவுக்கும் இரட்டை வேடத்தில் நடிக்கும் வாய்ப்பு கிடைத்தது. "இதயக் கமலம்" திரைப்படத்தில் இரண்டு விதமான மாறுபட்ட கதாபாத்திரத்தில் நடித்திருந்தார், தன்னுடைய திரைப்படங்களில் பெண்ணியம் சார்ந்த விஷயங்களை அதிகம் கையாளும் இயக்குனர் சிகரம் பாலசந்தரின் “காவியத்தலைவி” திரைப்படத்தில் நடிகை செளகார் ஜானகி இரண்டுவேடங்களில் நடித்து அமர்க்களப்படுத்தி இருப்பார்.

முன்னாள் தமிழக முதலமைச்சரும், திரைப்பட நடிகையுமான செல்வி ஜெ. ஜெயலலிதா அவர்களும் “யார் நீ, லட்சுமி, விஜயா, அடிமைப்பெண்” ஆகிய திரைப்படங்களில் இரட்டை வேடங்களில் நடித்திருக்கிறார். வாணிஸ்ரீ அவர்கள் “வாணி ராணி”, “இருளும் ஒளியும்” போன்ற திரைப்படத்திலும் இரண்டு வேடங்களில் நடித்திருக்கிறார்.

மனோரமா எத்தனையோ திரைப்படங்களில் இரட்டைவேடத்தில் நடித்திருந்தாலும் “பத்து மாத பந்தம்” திரைப்படத்தில் மூன்று கதாபாத்திரத்தில் நடித்திருக்கிறார். நடிகை சச்சு அவர்களும் "சொர்க்கம்" திரைப்படத்தில் ஐந்து விதமான கதாபாத்திரத்தில் நடித்திருக்கிறார். நடிகை தேவிகா “வானம்பாடி, நெஞ்சம் மறப்பதில்லை” போன்ற திரைப்படங்களில் இரட்டைவேடத்தில் நடித்திருக்கிறார். நடிகை சுமித்ரா அவர்களுக்கும் “கடவுள் அமைத்த மேடை” திரைப்படத்தில் இரட்டை வேடத்தில் நடிக்கும் வாய்ப்பு கிடைத்தது.

1980 - 1990 காலகட்டத்தில் என்று பார்த்தால், நடிகை ஸ்ரீதேவியும் “வணக்கத்திற்குரிய காதலியே” திரைப்படத்தில் இரட்டை வேடத்தில் நடித்திருக்கிறார். நடிகை அம்பிகா “தங்கமடி தங்கம், பேய்வீடு” ஆகிய திரைப்படத்திலும், நடிகை ராதா “சின்னப்பதாஸ்” படத்திலும் இரட்டைவேட கதாபாத்திரத்தில் நடித்திருக்கிறார்கள். தமிழ்சினிமாவையே தன்னுடைய கவர்ச்சியால் கலங்கடித்தவர் நடிகை சில்க் ஸ்மிதா. இவர் இருந்தால்தான் திரைப்படத்தை வாங்குவோம் என்று விநியோகஸ்தர்கள் அடம்பிடித்த காலகட்டமும் உண்டு. அத்தகைய சில்க்ஸ்மிதா "சில்க், சில்க், சில்க்" என்ற திரைப்படத்தில் மூன்று கதாபாத்திரத்தில் நடித்திருந்தார்.

அற்புதமான நடனமும், நடிப்பும் ஒருங்கே அமைந்த நடிகை பானுப்பிரியா. பானுப்பிரியாவுக்கும் “காவியத்தலைவன்” திரைப்படத்தில் இரட்டை வேடத்தில் நடிக்கும் வாய்ப்பு கிடைத்தது. எத்தனையோ கதாநாயகிகளுக்கு நடிக்க வாய்ப்பு கிடைத்தாலும், அவர்களுக்கான திரைப்பட ஆயுள் என்பது மிகக்குறைவாகவே இருக்கிறது. அதிலும் இரட்டைவேடத்தில் நடிப்பது என்பது மிகவும் அரிய வாய்ப்பாகவே இருக்கிறது. இந்த கால கட்டத்திலும் சில நடிகைகளுக்கு அத்தகைய அரிய வாய்ப்பு கிடைத்திருக்கிறது.

தொண்ணூறுகளின் பிற்பகுதியிலும், இரண்டாயிரம் ஆண்டின் ஆரம்பங்களிலிருந்தும் நடிகைகளுக்கான இரட்டைவேட கதாபாத்திரங்கள் குறையத்தொடங்கின. முன்னாள் உலக அழகியான ஐஸ்வர்யாராய் (ஐஸ்வர்யா பச்சன்) தன்னுடைய முதல் திரைப்படத்திலேயே அத்தகைய வாய்ப்பை பெற்றார். இயக்குநர் மணிரத்னம் தன்னுடைய “இருவர்” திரைப்படத்தில் ஐஸ்வர்யாராயை இரட்டைவேடத்தில் நடிக்க வைத்தார். "நாடோடி மன்னன்" திரைப்படத்தில் இரட்டைவேடத்தில் நடிக்கும் வாய்ப்பு நடிகை மீனாவுக்கும் கிடைத்தது. அதைத்தொடர்ந்து "மாயாபஜார் 1995" என்ற திரைப்படத்தில் நடிகை ஊர்வசியும் இரண்டு கதாபாத்திரங்களில் நடித்து அட்டகாசப்படுத்தி இருப்பார். கவர்ச்சி பதுமையாக பயன்படுத்தப்பட்ட நடிகை மும்தாஜுக்கும் இரட்டை வேடத்தில் நடிக்கும் வாய்ப்பு கிடைத்தது. சாக்லேட் திரைப்படத்தில் இரட்டை வேடங்களில் மும்தாஜ் நடித்திருப்பார்.

கதாநாயகி இரட்டைவேடத்தில் நடிப்பதால் திரைக்கதையில் மிகப்பெரிய திருப்புமுனை கொடுத்தபடம் "பாண்டவர் பூமி". ஆம். இந்த திரைப்படத்தில் நடிகை ஷமீதாவை இரட்டை வேடத்தில் நடிக்க வைத்திருப்பார் இயக்குனர் சேரன். அதைத்தொடர்ந்து நடிகை ஸ்நேகாவுக்கும் அத்தகைய வாய்ப்பு இயக்குநர் கரு.பழனியப்பன் மூலமாக பார்த்திபன் கனவு திரைப்படத்தில் கிடைத்தது. நடிகை ஸ்நேகா மிக அழகாக இரண்டு கதாபாத்திரங்களில் நடித்திருப்பார். துறுதுறு நடிகை ஜோதிகாவும் இரட்டைவேட கதாபாத்திரத்தில் நடித்திருக்கிறார். மலையாளத்தில் பெரும் வெற்றி பெற்ற "குஞ்சுகூனன்" திரைப்படத்தை தமிழில் தயாரித்தார்கள். அதுதான் பேரழகன் திரைப்படம். இந்த திரைப்படத்தில் மாடர்ன் பெண்ணாகவும், கண் தெரியாத பெண்ணாகவும், இரண்டு வித்தியாசமான கதாபாத்திரத்தில் தூள் கிளப்பி இருப்பார் நடிகை ஜோதிகா.

தற்போதைய கால கட்டத்தில் ஒரு கதாநாயகிக்கு இரட்டை வேடங்கள் கிடைப்பது என்பது மிகவும் அரிதிலும் அரிது. நடிகைகள் என்றால் வெறும் கவர்ச்சி பொம்மைகளாக மட்டுமே பார்க்கும் பார்வையிலிருந்து படைப்பாளிகள் சற்று விலகினால் மட்டுமே நடிகைகளுக்கு இரட்டை வேடங்கள் உருவாகும். கதாநாயகர்களுக்கு மட்டுமே கதை உருவாக்கும் சூழல்களிலிருந்து எப்பொழுதாவதுதான் நாம் வெளியே வருகிறோம். இந்த நிலை மாறி கதைகளுக்காக மட்டுமே நடிகர் நடிகைகள் என்ற சூழ்நிலை உருவாகும் பட்சத்தில், நடிகைகளுக்கான இரட்டை வேடங்கள் கொண்ட திரைப்படங்களும் அதிகம் வரும்.

மேலும், சில நடிகைகளும் நல்ல கதையம்சம் கொண்ட கொண்ட திரைப்படங்களில் நடிக்க ஆர்வம் காட்டுவதில்லை. ஒரு குழந்தைக்கு அம்மாவாக நடிக்க வேண்டும், படம் முழுவதும் கவர்ச்சியின்றி நடிக்க வேண்டும் என்பது போன்ற கோரிக்கைகளை சில நடிகைகள் ஏற்பதில்லை. சில பரிசாட்சயத்துவமான முயற்சிகளுக்கு நடிகைகளது ஒத்துழைப்பும் கிடைப்பதில்லை. எதற்காக வீண் சிரமம் எடுக்க வேண்டும்? கொடுக்கும் பணத்திற்கு இரண்டு வேடத்தில் நடித்து கஷ்டபடவேண்டுமா? என்று கதாநாயகிகள் யோசிக்கிறார்களா? இல்லை ஒரு கதாபாத்திரத்திற்கே நடிகையிடம் நடிப்பை வாங்குவது பெரும்பாடாக இருக்கிறது, இதில் இரண்டு கதாபாத்திரங்கள் கொடுத்து எப்படி சமாளிப்பது? என்று படைப்பாளிகள் யோசிக்கிறார்களா என்பது புரியாத புதிர்தான்.


இதனாலயே இயக்குநர்கள் கதாநாயகிகளுக்கு முக்கியத்துவம் கொடுத்து இரட்டைவேட கதாபாத்திரங்கள் அமைக்க தயங்குகின்றனர். எந்தவிதமான கதாபாத்திரங்கள் கொடுத்தாலும் ஏற்று நடிக்கும் மனப்பக்குவம் நடிகைகளுக்கு வரும் பட்சத்தில், நடிகைகளுக்கு உண்டான இரட்டைவேட திரைப்படங்களும் இனி வரும் காலத்திலும் சாத்தியமே.

Wednesday, December 16, 2009

தமிழ் சினிமா தவறவிட்ட சில முத்துக்கள்

தமிழ்சினிமா அவ்வப்போது சிலரை தூக்கி சிகரத்தில் வைக்கும். சிகரத்தில் இருக்கும் சிலரை படுபாதாளத்தில் தள்ளிவிடும். சிலர் வெற்றிபெருவதை பார்க்கையில் நமக்கே கூட வேடிக்கையாய் இருக்கும். எதனால் இவர் வெற்றிபெற்றார் என்று நம்மால் யூகிக்கவே முடியாது. இந்த ரகத்தினராவது பரவாயில்லை. இன்னொரு ரகத்தினரும் இருக்கின்றனர். அதாவது சர்வ நிச்சயமாய் நமக்கு தெரியும் இவர் மிகப்பெரிய திறமைசாலி என்று. ஆனால் அப்படிப்பட்ட திறமைசாலிகளை ஏன் தமிழ்சினிமா சரியாக பயன்படுத்திக்கொள்ளவில்லை என்று யோசித்தால் நமக்கே கேள்விக்குறிதான் மிஞ்சும். அப்படி தமிழ் சினிமாவால் சரியாக கண்டுகொள்ளாமல் விடப்பட்ட சில திறமைசாலிகளை இங்கே பார்க்கலாம்.

வி.குமார் : நாணல், நீர்க்குமிழி, ஏழைக்கும் காலம் வரும். அரங்கேற்றம், கட்டிலா தொட்டிலா, மேஜர் சந்திரகாந்த் போன்ற பல வெற்றிபடங்களுக்கு இசையமைத்தவர்."காதோடுதான் நான் பாடுவேன்", "புன்னகை மன்னன் பூவிழி கண்ணன்" போன்ற காலத்தால் அழியா அற்புத பாடல்களை உருவாக்கியவர். பாலச்சந்தர் தன்னுடைய படங்களில் இவருக்கு தொடர்ந்து வாய்ப்பளித்தார். மிகச்சிறந்த திறமைசாலி. ஆனால் என்ன காரணம் என்று தெரியவில்லை. இவரை தமிழ்சினிமா தன்னுடைய அரவணைப்பிற்குள் எடுத்துக்கொள்ளவில்லை. தமிழ்சினிமா மட்டும் இவரை சரியாக பயன்படுத்திக்கொண்டு இருக்குமேயானால், நிச்சயம் எம்.எஸ்.விஸ்வநாதனுக்கு இணையான ஒரு இசையமைப்பாளரை இழந்திருக்க மாட்டோம்.

மகேந்திரன் : தமிழ்சினிமாவின் மிகச்சிறந்த படங்கள் என்று வரிசைப்படுத்தினால் அதில் இவரால் இயக்கப்பட்ட “உதிரிப்பூக்கள்” திரைப்படமும் நிச்சயம் இடம்பெறும். தமிழ் சினிமாவின் ரசிப்புத்தன்மையை வேறோரு கட்டத்துக்கு அழைத்துசென்ற இயக்குனர். முள்ளும் மலரும், பூட்டாத பூட்டுக்கள், ஜானி, நெஞ்சத்தை கிள்ளாதே, மெட்டி போன்ற பல அற்புத படங்களை உருவாக்கியவர். தமிழ்சினிமாவின் தவிர்க்கமுடியாத இயக்குனராக அறியப்பட்டவர். விமர்சகர்களாலும் வெகுவாக புகழ்ப்பட்டவர். ஆனால் இத்தனை திறமைவாய்ந்த ஒரு இயக்குனரை தமிழ்சினிமா ஏன் சரியாக பயன்படுத்திக்கொள்ளவில்லை என்பது இன்றளவும் புரியாத கேள்வி.

கஜோல் : இந்தி சினிமாவின் ராஜகுமாரி. வசீகர புன்னகையாலும், மெஸ்மெரிச கண்களாலும் ரசிகனை மெய்மறக்க செய்யும் ஒரு அற்புத நடிகை. ஃபனா என்றொரு திரைப்படத்திற்காக இந்தி சினிமாவின் மிகப்பெரும் நடிகர் ஆமீர்கானே கஜோலுக்காக மூன்று மாதங்கள் காத்திருந்தார் என்ற ஒருவரி செய்தி போதும் கஜோலின் முக்கியத்துவத்தை உணர்த்த.. அப்படிப்பட்ட மிகத்திறமைவாய்ந்த ஒரு நடிகை, தமிழ்சினிமாவில் “மின்சாரக்கனவு” என்ற என்ற ஒரு திரைப்படத்தில் நடித்தார். மின்சாரக்கனவு திரைப்படத்தை கஜோல், ரஹ்மான் இருவரும் தங்கள் தோளில் தூக்கி சுமந்திருப்பார்கள். கடவுளையே நினைத்துக்கொண்டிருப்பது, பின் மெல்லிதாக காதல் வயப்படுவது. காதல் வந்த பிறகு அதை வெளிப்படுத்த தயக்கம், காதலா, கடவுளா என்று தடுமாறுவது என அத்தனை விஷயங்களையும் மிக அற்புதமாக வெளிப்படுத்தி இருப்பார். இவர் பேசவே இல்லை என்றால் கூட போதும். அத்தனை விஷயங்களையும் இவரது கண்ணே சொல்லிவிடும். அற்புதமான நடிகை. ஆனால் நம் தமிழ்சினிமா இப்படிப்பட்ட ஒரு திறமையான நடிகையை பயன்படுத்திக்கொள்ள தவறிவிட்டது.

நந்திதாதாஸ் : இயக்குனர், கதாசிரியர், எழுத்தாளர், நடிகை என பன்முகத்திறமை வாய்ந்த ஒரு பெண். ஆங்கிலம், தமிழ், மலையாளம், கன்னடம்,பெங்காலி, மராட்டி, இந்தி, ஒரியா, என பல்வேறு ,மொழிகளில் பல்வேறு விருதுகளை வாங்கிக்குவித்தவர். இவர் தமிழில், கன்னத்தில் முத்தமிட்டால், அழகி, விஷ்வதுளசி, போன்ற சில படங்களில் மட்டுமே நடித்தார்.. ஆனால் இத்தனை திறமைவாய்ந்த ஒரு நடிகையை சரிவர பயன்படுத்திக்கொள்ளாமல், அரைகுறை நாயகிகளின் பின்னால் ஓடிக்கொண்டிருக்கிறோம். பின் எப்படி நம்மில் இருந்து உலகபடைப்புக்கள் வரும்?

ஸ்வர்ணலதா : எஸ்.ஜானகி, பி.சுசீலா, சித்ரா, சுஜாதா போன்றோருக்கு கிடைத்த அங்கீகாரமும், வாய்ப்புக்களும் இவருக்கு கிடைக்காமல் போனதற்கு என்ன காரணம் என்று தெரியவில்லை. இத்தனைக்கும் இவர் தேசிய விருது, மாநில விருது உட்பட பல விருதுகளை பெற்றவர்தான். மென்சோக பாடல்களை இவர் பாடுகையில் ஏனோ ஒரு வித சோகம் நம்முள்ளும் தானே வந்து அமர்ந்து கொள்ளும். “எவனோ ஒருவன் வாசிக்கிறான்”, “போறாளே பொன்னுத்தாயி”, ‘மாலையில் யாரோ”, போன்ற பல சூப்பர் ஹிட் பாடல்களை பாடி இருக்கிறார். இளையராஜா, ஏ.ஆர். ரஹ்மான், தேவா, வித்யாசாகர் உட்பட பலமுன்னணி இசையமைப்பாளர்களிடம் இவர் பாடல் பாடியிருக்கிறார். ஆனாலும் சமீப காலமாக இவரை ஏன் எந்த இசையமைப்பாளர்களும் கண்டுகொள்வதில்லை? எதனால் இவர் புறக்கணிக்கப்படுகிறார் என்ற கேள்வி புரியாத மர்மமாகவே இருக்கிறது.

அறிவுமதி: அரைவேக்காட்டுத்தனமாக பாட்டெழுத மாட்டேன் என்ற பிடிவாதத்தில் தமிழ் சினிமாவில் இருந்தே விலகியவர். பாடல் எழுதுவதை பணம் சம்பாதிக்கும் தொழிலாக கருதாமல் அதிலும் ஒரு கண்ணியம் இருக்க வேண்டும் என்று கருதுபவர். "மாலை என் வேதனை" "பொய் சொல்லக்கூடாது" “எங்கே செல்லும் இந்த பாதை”, “கவிதையே தெரியுமா?” என்று பல வெற்றிப்பாடல்களை எழுதியவர். இவர் எழுதிய சில வேகப்பாடல்களிலும் வார்த்தைகளில் கண்ணியம் ஒளிந்துகொண்டிருக்கும். பல புதிய பாடலாசிரியர்கள் உருவாக இவரே மிக முக்கிய காரணம். ஏ.ஆர். ரஹ்மான் கொடுத்தனுப்பிய மெட்டையே தனக்கு இதில் விருப்பமில்லை என திருப்பி அனுப்பியவர். இத்தகைய திறமை வாய்ந்த ஒரு பாடலாசிரியர் திரைத்துறையில் சமீபகாலமாக பாடல் எழுதுவது ஒதுக்கி வைத்திருக்கிறார் என்பது வருத்தத்திற்குரிய விஷயம். தமிழ் சினிமா தவற விட்ட முத்துக்களில் மிக முக்கியமானவர்

சந்தியா : மே மாதம் திரைப்படத்தில் கதாநாயகியாக நடித்தவர். இயல்பான அழகும், வெகுளியான சிரிப்பும், மிக முக்கியமாய் நன்றாகவும் நடிக்கத்தெரிந்த நடிகை. அந்த திரைப்படத்தில் "சந்தியா" என்ற கதாபாத்திரத்தில் விளையாடி இருப்பார். ஏ.ஆர்.ரஹ்மானின் இசை ஒரு பெரிய பலம் என்றால், இவரது நடிப்பும் மற்றொரு மிகப்பெரிய பலம். இவரது துறுதுறுப்பான நடிப்பு ரசிகர்களை பெரிய அளவில் கவர்ந்தது. காமெடி, நடனம், நடிப்பு, என எந்த துறையிலும் குறையும் சொல்ல முடியாத ஒரு நடிகை. மிகப்பெரிய அளவில் வருவார் என கணிக்கப்பட்ட நடிகை. தமிழ்சினிமாவில் இவரால் பிரகாசிக்க முடியாமல் போனதற்கு என்ன காரணம் என்று தெரியவில்லை. இந்த ஒரு படத்தைத் தவிர வேறு எந்த திரைப்படத்திலும் இவர் நடிக்கவில்லை. எதனால் தமிழ்சினிமா இப்படி ஒரு நடிகையை ஏற்றுக்கொள்ளவில்லை என்பது மற்றொரு புதிர்.

குட்டி "ஸ்வேதா" : 11 வயதுப்பெண்ணாக நடிக்க அறிமுகம் ஆகி, தன் வயதை விட அதிக விருதுகளை பெற்றவர். குட்டி என்ற தமிழ்திரைப்படத்தில் நம் எல்லோர் மனதிலும் ஈரம் கசிய வைத்த பெண். மல்லி, டெரரிஸ்ட், நவரசா போன்ற சர்வதேச திரைப்படங்களில் தன் முத்திரைய அழுத்தமாக பதித்தவர். அளவுக்கு மீறி நடிக்கும் குழந்தை நட்சத்திரங்களுக்கு மத்தியில் அலட்டிக்கொள்ளாமல் மிக இயல்பாய் நடித்து விமர்சகர்களின் பாராட்டை பெற்றவர். புத்தகப் பையை விட அதிக திறமைகளை சுமந்தவர். மணிரத்னம் மட்டும் சமீபத்தில் இவரை தன்னுடைய ஆய்த எழுத்து திரைப்படத்தில் உபயோகப்படுத்தி இருப்பார். எதனால் தமிழ் சினிமாவின் கவனம் இந்த பெண்ணின் மீது விழாமல் போனது என்பது ஆச்சர்யத்திலும் ஆச்சர்யம்.

இந்த வரிசையில் சில பேரை மட்டுமே இங்கு பட்டியலிட்டுக்காட்டி இருக்கிறோம். இதுபோல் எத்தனையோ திறமைசாலிகளை தமிழ்சினிமா கண்டுகொள்ளாமல் புறக்கணித்திருக்கிறது. தமிழ் சினிமா என்பது இயக்குனர்களும், தயாரிப்பாளர்களும், விநியோகஸ்தர்களும் என அத்தனை ஜாம்பவான்களும் சேர்ந்ததுதான். இவர்கள் அனைவரும் மனதார நினைக்கும் பட்சத்தில் இதுபோன்ற திறமைசாலிகள் நிச்சயம் அடையாளம் காட்டப்படுவார்கள். எத்தனையோ மிகச்சிறந்த எழுத்தாளர்கள், இயக்குனர்கள், பாடலாசிரியர்கள் என பல திறமைசாலிகள் இன்னமும் சரியான அங்கீகாரமின்றி அடையாளமற்று கிடக்கின்றனர். ஒரு சிறிய திறமை உடையவனாக இருந்தாலும் அவனை ஊக்குவிக்கும்போதுதான் அவன் சாதனைகள் வெளியே தெரியும். ஒரு தனிமனிதன் படைக்கும் சாதனை என்பது அவனுக்கான அங்கீகாரம் மட்டும் அன்று; அவன் சார்ந்த தொழிலுக்குமானதுதான். தமிழ் சினிமா இன்னும் பல சாதனைகளை படைக்க வேண்டும். இன்னும் பல சிகரங்களை எட்ட வேண்டும். அதற்கு இதுபோல் திறமை வாய்ந்த நபர்களை ஊக்குவிக்கவேண்டும்.

எளிதாக சொன்னால் "ஊக்குவிக்க ஆள் இருந்தால் ஊக்கு விற்பவன் கூட தேக்கு விற்பான்" என்ற வாலியின் வரியின் படி, இது போன்ற திறமைசாலிகளை அடையாளம் கண்டுகொண்டால் தமிழ் சினிமா இன்னும் பல சரித்திரங்கள் படைக்கும்.

Thursday, December 3, 2009

பிரதாப்பின் பிறந்தநாள்

சமீபத்தில் (23.11.2009 - திங்கட்கிழமை) எங்கள் பிரியமான நண்பன் பிரதாப்பின் பிறந்தநாள்.


(22.11.2009 - ஞாயிற்றுக்கிழமை) என்ன செய்யலாம் என்று யோசித்துக்கொண்டிருந்தோம். திங்கட்கிழமை பிறந்தநாள் என்பதால் பிரதாப்புக்கு மட்டும்தான் விடுமுறை. எனக்கும் விஷ்ணுவுக்கும் வேலை இருந்தது. சரி லீவ் போட்டுவிடலாம் என்று முடிவு எடுத்தாயிற்று. ஆனால் விஷ்ணு? கமாண்டோ வீரனாச்சே. எப்படி லீவ் கிடைக்கும்?அவனால் எப்படி வர முடியும் என்ற மிகப்பெரிய கேள்வி எழுந்தது. "டேய்! அது என் பிரச்சனைடா. வரேன்னு சொன்னா கண்டிப்பா வருவேன்" என்று ரஜினி ஸ்டைலில் சொல்லி முடித்தான் விஷ்ணு. சரி நாளை பார்க்கலாம் என்று முடிவானது. மகாபலிபுரம் போவதாக முடிவு எடுத்தாயிற்று.


(23.11.2009 - திங்கட்கிழமை) பிரதாப்பிற்கு, நானும் விஷ்ணுவும் தொலைபேசியில் வாழ்த்துக்களை தெரிவித்துவிட்டோம். நானும் பிரதாப்பும் விஷ்ணுவுக்காக விஷ்ணு வீட்டில் காத்துக்கொண்டிருந்தோம். மணி 9ஐ கடந்து, 10ஐ நெருங்கியது. கமாண்டோ வீரன் விஷ்ணு இன்னும் வரவில்லை. பிளான் போட்டது பாழாகிவிடுமோ என்ற பயத்தில் இருந்தோம். அதற்குள் பிரதாப்பின் அண்ணி பிரதாப்பிற்கு ஒரு வாட்ச் வாங்க வேண்டும் என்று சொன்னதால், பல இடங்கள் சுற்றி அண்ணாநகரில் உள்ள கனெக்ஷன்ஸ்'ல் ஒரு விலையுயர்ந்த வாட்ச் வாங்கி பரிசளித்தார். மறுபடியும் விஷ்ணு வீட்டில் விஷ்ணுவிற்காக காத்திருந்தோம். விஷ்ணு வந்தபாடில்லை. அதற்குள் பிரதாப் தன்னுடைய அலுவலகத்திற்கு சென்று நண்பர்களை சந்தித்துவிட்டு வந்துவிடுவதாக கூறிவிட்டு சென்றுவிட்டான். மணி 10.30. இப்போது சரியாக விஷ்ணு ஆஜர். எப்படிடா வர முடிஞ்சுது? என்று கேட்டதுக்கு, அதுதான் விஷ்ணு என்று தன்னுடைய ட்ரேட் புன்னகையை உதிர்த்தான்

இப்போது பிரதாப்பிற்காக மறுபடியும் காத்திருந்தோம். அதற்குள் விஷ்ணுவீட்டில் மொசைக்கல் வாங்கிவர வேண்டி இருந்ததால் நானும், விஷ்ணுவும் பைக்கில் கடைக்கு சென்றுவிட்டோம். அந்தக்கடையில் ஒரு அரைமணி நேரம் காத்திருக்க வேண்டி இருந்தது. அதற்குள் பிரதாப் விஷ்ணுவீட்டிற்கு வந்துவிட்டான். ஒருவழியாக மொசைக்கல் வாங்கிக்கொண்டு வீடு வந்து சேரும்போது மணி 11.45ஐ தாண்டி இருந்தது. இதற்கு மேல் மகாபலிபுரம் செல்வது சரியாக இருக்காது என்பதால் பறக்கும் ட்ரெயினில் கேக் வெட்டி கொண்டாடலாம் என்று முடிவெடுத்தோம்.


காலையில் இருந்து சாப்பிடாததால் சரியான பசி. எங்கேயாவது சாப்பிட்டுவிட்டு பயணத்தை தொடரலாம் என்று முடிவெடுத்தோம். இருவரது பைக்கும் விர்ரென்று புறப்பட்டது. நேரே Kabaabish ரெஸ்ட்டாரண்டில் நுழைந்தோம். நானும், விஷ்ணுவும் சேர்ந்து பிரதாப்பிற்கு ட்ரீட் கொடுப்பதாக முடிவானது. மூவருக்கும் சிக்கன் பிரியாணி, தந்தூரி சிக்கன், சிக்கன் லாலிபாப், மறுபடியும் சிக்கன்கோம்போ, கூல்டிரிங்க்ஸ் என இஷ்டத்திற்கு ஆர்டர் செய்தாயிற்று. சாப்பிட, சாப்பிட வந்து ஐயிட்டங்கள் கொண்டே இருந்தது. என்ன செய்வதென்றே புரியவில்லை. பிரதாப்பின் கண்களில் கண்ணீர் எட்டிப்பார்த்தது. (சந்தோஷத்தில் அல்ல.. சாப்பிடமுடியாமல்).. ஒருவழியாக அத்தனை கோழிகளிடமும் சண்டையை முடித்துவிட்டு, பில்லை செட்டில் செய்துவிட்டு வெளியே வந்தோம். எங்கேயாவது படுத்தால் போதும் என்று தோன்றியது. எங்கள் வீட்டிற்கு போகலாம் என்றால் அவ்வளவு தூரம் வண்டி ஓட்ட முடியாததால் வள்ளுவர்கோட்டத்திற்கு மெதுவாக வண்டியை உருட்டிக்கொண்டே சென்றோம்.
உள்ளே சென்று தரையிலேயே படுத்துவிட்டோம். எவ்வளவு நேரம் படுத்துகிடந்திருப்போம் என்று தெரியவில்லை. மெதுவாக பல கதைகளை பேசிவிட்டு, போனால் போகிறதென்று வள்ளுவரையும் தரிசித்துவிட்டு வீடு வந்து சேர்ந்தோம். மிக அழகான தருணங்கள்.
பிரதாப் Wish you many more Happy returns of the Day da ........


Tuesday, November 17, 2009

என் கேள்விக்கென்ன பொருள்?


“ஆழ்கடல்ல இருக்கிறதைக்கூட கண்டு பிடிச்சுடலாம். ஆனா ஒரு பெண்ணோட மனசுல இருக்கிறதை கண்டே பிடிக்க முடியாது”ன்னு சொல்லுவாங்க. அது ஓரளவுக்கு உண்மைதாங்க. அவங்க என்ன நினைக்குறாங்களோ, அதை சூசகமா வார்த்தைகள்'ல வெளிப்படுத்துவாங்க. ஆனா நம்மளாலதான் அதை புரிஞ்சுக்க முடியறது இல்லை. உதாரணத்துக்கு அவங்க சூசகமா சொல்லக்கூடியா வார்த்தைகளையும், அதுக்கு பின்னணியில இருக்கிற “உண்மையான” அர்த்தத்தையும் இப்போ நாம பார்க்கலாம்.

1. உங்களுக்கு என்ன பிடிக்கும்? = இந்தக் கேள்வையை அவங்க கேட்டாங்கன்னா உடனே நாம வரிஞ்சுகட்டிக்கிட்டு நமக்கு பிடிச்சதை எல்லாம் ஒப்பிப்போம். ஆனா இந்தக்கேள்விக்கு பின்னாடி இருக்கிற அர்த்தம் என்ன தெரியுமா? உனக்கு பிடிக்கிற விஷயத்தை எல்லாம் என்னால ஃபாலோ பண்ண முடியாது, அப்படிங்கிறதுதான் இந்த கேள்விக்கு விளக்கம்..


2 அந்த பொண்னு எவ்ளோ அழகா புடவை கட்டி இருக்கா இல்ல = அப்படின்னு எதாவது ஒரு விளம்பரத்தை பார்த்திட்டு சொன்னா, உடனே நாம் அந்த பொண்ணோட அழகைப்பத்திதான் யோசிப்போம். ஆனா, அவங்க நம்மகிட்ட சொல்லவர்றது என்னன்னா, அந்த கடைக்கு கூட்டிட்டு போய் அதே மாதிரி புடவையை எனக்கும் வாங்கிக்குடுடா அப்படிங்கிறதுதான் இதுக்கு அர்த்தம்


3. இன்னைக்கு என்ன சமையல் பண்ணட்டும்? = இந்தக்கேள்வியைக் கேட்டுட்டா அடடா நமம பொண்டாட்டி நம்மகிட்ட கேட்டுகிட்டுத்தான் சமையலே செய்யுறாளே அப்படின்னு நீங்க புளங்காகிதம் அடையக்கூடாது. டேய்! இன்னைக்கு உன்னைக்கேட்டுதான் சமைக்குறேன். மிச்சமாச்சுன்னா என்னால நாய்'க்கு எல்லாம் துக்கிப்போட முடியாது. எல்லாத்தையும் நீதான் சாப்பிட்டு தொலைக்கணும். இதுதான் இந்த கேள்விக்கு அர்த்தம்


4. உங்களுக்கு எத்தனை ஃபிரண்ட்ஸ் இருக்காங்க? = இந்த கேள்விக்கு அர்த்தம் என்ன தெரியுமா? உங்க பிரண்ட்ஸுங்கன்னு சொல்லி ஒருத்தன் கூட வீட்டுக்கு வரக்கூடாது. உனக்கு வடிச்சு கொட்டுறதே தண்டம், இதுல அவனுங்களுக்கு வேற என்னால் வடிச்சு கொட்ட முடியாது. இதுதான் இந்த கேள்விக்கு அர்த்தம்.


5. என்னமோ பண்ணுங்க = பரவாயில்லை நம்ம சாய்ஸுக்கு விட்டுட்டாளே’ன்னு நீங்க யோசிச்சீங்கன்னா, உங்களை விட இளிச்சவாயன் இந்த உலகத்துலேயே இருக்க முடியாது நீயெல்லாம் திருந்தவே மாட்டே. எனக்கு இது பிடிக்கலை. இதுக்கு மீறி எதாவது செஞ்சேன்னா, மவனே தொலைச்சு கட்டிடுவேன். அப்படிங்கிறதுதான் இந்த வார்த்தைக்கு அர்த்தம்.


6. எல்லாத்தையும் நான் பொறுப்பா பார்த்துக்குறேன் = இந்த வார்த்தைய சொன்ன உடனே உங்களுக்கு உச்சி குளிர்ந்திடுமே. அப்படியெல்லாம் சின்னப்புள்ளத்தனமா யோசிக்கக்கூடாது. இந்த வார்த்தைக்கு என்ன அர்த்தம் தெரியுமா? எப்பபார்த்தாலும் தண்டத்துக்கு ஊர் சுத்திகிட்டு இருக்குறதே உனக்கு பொழப்பா இருக்கு. இதுல குடும்பத்தை எங்கே கவனிச்சுக்க போறே? மொதல்ல சம்பளக்கவரை என் கையில கொடு. இதுதான் இந்த வார்த்தைக்கு அர்த்தம்



7. நம்ம பையன் ஸ்கூல்'ல பேரண்ட்ஸ் மீட்டிங் இருக்காம் = அக்கறையா நம்ம கூப்பிடுறாங்கன்னு நீங்க தப்பா திங்க் பண்ண கூடாது. இந்த வார்த்தக்கு என்ன அர்த்தம் தெரியுமா? உன் புள்ளையோட லட்சணத்தை நீயும் தெரிஞ்சுக்க வேணாம் ? ஸ்கூல்ல மிஸ்’கிட்ட நான் மட்டும் திட்டு வாங்கினா போதுமா?. நீயும் ஒரு நாள் வந்து வாங்கிப்பாரு. அப்பத் தெரியும்.

8. இந்த ஃபோன்'ல சரியாவே சிக்னலே கிடைக்கமாட்டேங்குது = இந்த வார்த்தையை சொன்ன உடனே, ஏதாவது நெட் வொர்க் பிராப்ளமா இருக்கும்ன்னு நீங்க சொல்லுவீங்க. ஆனா அவங்க என்ன சொல்ல வர்றாங்க தெரியுமா? நட்டு கழண்டவனே! நீ மட்டும் ஸ்டைலா ஃபோன் வாங்கி வெச்சிருக்கே. எனக்கு மட்டும் செகண்ட் ஹாண்ட்'ல, அதுவும் இத்துப்போன மொபைல் வாங்கிக் கொடுத்திருக்கே. மொதல்ல இதை மாத்திட்டு நோக்கியா N 95 வாங்கிக்கொடு. அப்படிங்கிறதுதான் இதுக்கு அர்த்தம்.

9. இந்த நகைபோட்டா கழுத்துல ஒரே அரிப்பா இருக்கு = அப்படின்னா உடனே கழட்டி வெச்சிடுன்னு நீங்க சொல்லக்கூடாது கவரிங்'ல வாங்கிக்கொடுத்தா இப்படித்தான் இருக்கும். நகை வாங்கிக்கொடுத்து எத்தனை வருஷம் ஆச்சு? மொதல்ல ஒரு நகைக்கடைக்கு கூட்டிட்டு போய், 916 ஹால்மார்க் நகையா வாங்கிக்கொடு. அப்படின்னுதான் அவங்க சொல்ல வர்றாங்க.

10. எவ்ளோ வேலைதாங்க நீங்க செய்யுவீங்க ? = உடனே நம்ம மேல எவ்ளோ பரிதாபப்படுறாங்க'ன்னு நீங்களா ஒரு செண்டிமெண்ட் உருவாக்கிக்காதீங்க. அட அறிவுகெட்டவனே.. உன் வேலையுண்டு, வீடு உண்டுன்னு வந்து சேர வேண்டியதுதானே. கண்டவன் பிரச்சனையில எல்லாம் நீ ஏன் தலையிட்டு ஓவரா சீன் போடுறே? அப்படிங்கிறதைத்தான் அவங்க சொல்லாம சொல்றாங்க.

11. ஏங்க! இந்த சத்யம் தியேட்டர் எங்கே இருக்கு? = நீ மட்டும் உன் ஃபிரண்ட்ஸுங்களோட போய் கண்ட படத்தையும் பார்த்திட்டு வந்திடுறே. என்னை என்னைக்காவது அந்த தியேட்டருக்கு எல்லாம் கூட்டிட்டு போயிருக்கியா? - அப்படின்னு உங்களை கேட்கறதுக்கு பதிலாத்தான் இந்தக் கேள்வியை அவங்க கேட்குறாங்க.


நண்பர்களே... இந்த உண்டான அர்த்தத்தை எல்லாம் மனப்பாடம் பண்ணி வெச்சுக்குக்குங்க. ஒருவேளை உங்க மனைவியோ, இல்லை காதலியோ இந்த மாதிரி கேள்வியை உங்ககிட்ட கேட்டாங்கன்னா, அதுக்கு என்ன அர்த்தம்'ன்னு தெரியாம நீங்க முழிக்க கூடாது இல்லை. அதுக்குத்தான் சொன்னேன்.

Tuesday, November 10, 2009

ச்சீய்.. நீ ரொம்ப கெட்ட பையன்டா


"கொடி இடையாள்" என அழைத்தால்
கோபப்படுவாயே! -இப்படி என் மீது
படர்கையில் என்னவென்று
நான் உன்னை அழைப்பது?


பொம்மையின் காதைத்திருகி
சாவி கொடுப்பது போல்... என் காதைத்திருகி
உன் விளையாட்டை ஆரம்பிக்கிறாய்..
ஆனால் கடைசியில்
"ச்சீய்.. நீ ரொம்ப கெட்ட பையன்டா"
என்ற பெயர் மட்டும் எனக்கு....

நீ புன்னகைக்காததால்
என் புகைப்படக்கருவிக்கூட
பணி செய்ய மறுக்கிறது..

இருள் சூழ்ந்துவிட்டது என
நினைத்துக் கொண்டிருக்கிறாய்.
சற்று உற்றுப்பார்....
சூரியன் தன் ஓரக்கண்ணால்
நம்மை ரசித்துக்கொண்டிருப்பதை.....


Monday, November 9, 2009

தமிழ்சினிமாவில் கிராஃபிக்ஸ்



இன்றைய கால கட்டத்தில் தமிழ் சினிமாவில் தவிர்க்க முடியாத விஷயங்களில் ஒன்று கம்ப்யூட்டர் கிராஃபிக்ஸ். டைட்டில் கார்ட் போடுவதில் தொடங்கி வணக்கம் போடும் வரை கிராஃபிக்ஸின் தேவை மிக அவசியமான ஒன்று. எண்பதுகளின் துவக்கத்தில் மாயாஜால படங்களிலும், தந்திர படங்களிலும் மட்டுமே சிற்சில டெக்னாலஜி உத்திகள் பயன்படுத்தப்பட்டன. அந்த டெக்னாலஜி உத்தியின் பின்னணியில் எடிட்டரின் பங்கும், கேமரா மேனின் பங்கும்தான் இருக்கும். விட்டாலாச்சார்யாவின் படங்களில் பெரும்பாலும் இதுபோன்ற கிராஃபிக்ஸ் காட்சிகள் மிக அதிக அளவில் இருக்கும். கதையைவிட, இது போன்ற மாயாஜாலகாட்சிகளின் ஆட்சியே இவரது படங்களில் அதிகமாக இருக்கும். விட்டாலாச்சார்யாவை தொடர்ந்து இது போன்ற கிராபிக்ஸ் காட்சிகளை தன் படத்தில் அதிகமாக உபயோகப்படுத்தியவர் இராம.நாராயணன். ஆனால் இதுபோன்ற தந்திர காட்சிகளுக்கு இவர்கள் பெரும்பாலும் நம்பி இருந்தது எடிட்டரையும், கேமராமேனின் துணையையும்தான். ஏனெனில் கம்ப்யூட்டர் கிராஃபிக்ஸ் தொழிநுட்பம் அந்த அளவிற்கு நம்மிடையே வளர்ச்சி பெறாத காலகட்டம் அது.

கம்ப்யூட்டர் கிராஃபிக்ஸின் ஆதிக்கம் தமிழ் சினிமாவில் மெல்ல வளர்ச்சியடைய தொடங்கிய கால கட்டம் என்றால் அது தொண்ணூறுகளின் ஆரம்பம்தான். ஜெண்டில்மேன் திரைப்படத்தில் “சிக்கு புக்கு ரயிலே” பாடலில் பிரபுதேவாவின் காதுகளில் இருந்து புகைவருவது, கண்ணீர் விடுவது போன்ற சிற்சில காட்சிகளை இயக்குனர் ஷங்கர் அறிமுகப்படுத்தி இருந்தார். “ராஜா சின்ன ரோஜா” திரைப்டத்தில் ஒரு பாடலில் யானை, குரங்கு போன்ற காட்சிகளை அனிமேஷன் முறையில் அறிமுகப்படுத்தி இருந்தாலும் இயக்குனர் ஷங்கரால் அறிமுகப்படுத்தப்பட்ட அனிமேஷன்கள் தரத்தில் உயர்ந்ததாக இருந்தன.

ஜெண்டில்மேனை தொடர்ந்து காதலன் திரைப்படத்தில் “முக்காபலா” பாடலில் ஒரு BGM முழுவதும், பிரபுதேவாவின் உடல் உறுப்புகளை மறைத்தவாறு அறிமுகப்படுத்தப்படுத்தப்பட்ட கிராஃபிக்ஸ் காட்சிகளும் கைத்தட்டலை பெற்றன. இநத வெற்றிகள் கிராபிக்ஸ் தொழிநுட்பத்தின் அவசியத்தை தமிழ்சினிமாவிற்கு எடுத்துக்காட்டின. ஷங்கரைத்தொடர்ந்து எல்லா இயக்குனர்களும் கம்ப்யூட்டர் கிராஃபிக்ஸை தங்கள் படங்களில் பயன்படுத்தத் தொடங்கினர். மெல்ல மெல்ல கிராஃபிக்ஸ் தொழிநுட்பத்தின் ஆக்டோபஸ் கரங்களுக்குள் தமிழ் சினிமா மாட்டிக்கொண்டு இருந்த கால கட்டத்தில் ஷங்கர் புதுமையான ஒரு உத்தியை கையாளத்தொடங்கினார்.

டிராட்ஸ்கி மருது மற்றும் சில இந்திய அளவில் புகழ் பெற்ற சில கிராபிக்ஸ் கலைஞர்களை கொண்டு தன் திரைப்படத்தில் காட்சிகளை அமைத்துக்கொண்டு இருந்த ஷங்கர், தனது ஜீன்ஸ் திரைப்படத்தில் ஒரு புதுமையை செய்தார். ஹாலிவுட் கிராஃபிக்ஸ் கலைஞர்களின் உதவியோடு மோஷன் கேப்ச்சர் என்ற புது கிராபிக்ஸ் தொழில்நுட்பத்தை அறிமுகப்படுத்தி இருந்தார். இரட்டைவேட காட்சிகள் கொண்ட திரைப்படத்தை எத்தனையோ நாம் பார்த்திருந்தாலும் ஜீன்ஸ் திரைப்படம் கிராபிக்ஸ் தொழில்நுட்பத்தில் ஒரு உச்சம். இன்றுவரை இரட்டைவேடகாட்சிகள் கொண்ட திரைப்படத்தை ஜீன்ஸுக்கு நிகராக நாம் சொல்ல முடியாது. அத்தனை நேர்த்தியாக கிராஃபிக்ஸ் உத்திகள் கையாளப்பட்ட திரைப்படம் அது.


அதிலும் குறிப்பாக கண்ணோடு காண்பதெல்லாம் பாடலில் ஒரு ஐஸ்வர்யாராயின் பக்கத்தில் பிரசாந்த் செல்ல, லக்ஷ்மி வந்து அவரை இழுத்துவிடுவார். உடனே இன்னொரு பிரசாந்த், மற்றொரு ஐஸ்வர்யாராயின் பக்கம் சுற்றி வருவார். லக்ஷ்மி மறுபடியும் அவஸ்தையோடு அந்த பிரசாந்தையும் இழுத்துவிடுவார். இரண்டு ஐஸ்வர்யா ராய், இரண்டு பிரசாந்த், அவற்றில் ஒரு ஐஸ்வர்யாராயும் ஒரு பிரசாந்தும் கிராஃபிக்ஸ், ஆனால் லக்ஷ்மி இருவரையும் தள்ளி தள்ளி விடுவார். கட் செய்யப்படாத காட்சி. இன்றுவரை அதன் சூட்சுமமே பார்வையாளனுக்கு புரியாது. இந்த ஒரு காட்சிமட்டும் 15 நாட்களுக்கு மேல் படம்பிடிக்கப்பட்டது. மிக உயர்ந்த கிராபிக்ஸ் கலைஞர்கள் அனைவராலும் பாராட்டப்பட்ட காட்சி அது.

இவ்வாறு கிராபிக்ஸ் தொழில்நுட்பம் தமிழ் சினிமாவில் தவிர்க்க முடியாத இடம் பிடிக்க இயக்குனர் ஷங்கர் ஒரு முக்கிய காரணாம். இதற்கு மேல் கிராபிக்ஸில் வேறு என்ன புதிதாக செய்ய முடியும் என்ற அனைவரும் நினைத்துக்கொண்டிருந்த வேளையில், மற்றொரு புதுமையான உத்தியும் ஷங்கரால் அறிமுகப்படுத்தப்பட்டது. ஆம். அதுதான் “பாய்ஸ்” திரைப்படத்தில் உபயோகப்படுத்தப்பட்ட "டைம் ப்ரீஸ் ஸ்லைஸ்" டெக்னிக். அதாவது ஒரு குறிப்பிட காட்சியை 36 ஸ்டில் கேமராக்களிலும் இரண்டு மூவி கேமராக்களிலும் படம் பிடித்து ஒரே காட்சியாக தருவதுதான் அது.

“அலே அலே” பாடலில் சித்தார்த் ஓடிவரும் காட்சியை முதல் கேமரா படம் பிடிக்க, சித்தார்த் ஜெனிலியாவிற்கு முத்தம் கொடுக்கும் அந்த மிக முக்கியமான நொடியை 36 ஸ்டில் கேமராக்களும் ஸ்டில் எடுக்க, முத்தமிட்ட பின் நிகழும் விளைவை மற்றொரு கேமரா படம் பிடிக்க, இந்த மூன்று நிகழ்வுகளும் ஒரே காட்சியாக விரியும். கிராபிக்ஸின் தொழிநுட்பத்தோடு மிக அற்புதமாக இணைக்கப்பட்ட காட்சி அது.

இன்று கிராஃபிக்ஸின் வளர்ச்சி என்பது நினைத்துபார்க்கவே முடியாத எல்லைகளை கொண்டது. ஆனால் நம் தமிழ் சினிமாவில் அதனை மிகச்சரியாக பயன்படுத்தாமல் தேவையற்ற விஷயங்களுக்கு எல்லாம் பயன்படுத்தப்படும்போது, கிராபிக்ஸ் என்பது கேலிப்பொருளாகி விடுகிறது. இயக்குனர் மணிரத்னம் தன்னுடைய குரு திரைப்படத்தில் ஐஸ்வர்யாராய் ஆடிப்பாடுவது போல் வரும் “நன்னாரே நன்னாரே” பாடலில் மழையை கிராஃபிக்ஸில் உருவாக்கி இருப்பார். எது உண்மையான மழை, எது கிராபிக்ஸ் மழை என்று பந்தயம் வைத்தால் கூட நம்மால் கண்டு பிடிக்க முடியாது. அந்த அளவிற்கு மிக நுணுக்கமாக கிராபிக்ஸை பயன்படுத்தி இருப்பார்.

தசாவதாரம் போன்ற ஒரு கதையை எடுக்க வேண்டும் என்ற கமலின் யோசனையின் பின்னணியில் அணிவகுத்து நிற்பவர்கள் கிராபிக்ஸ் தொழில்நுட்பக்கலைஞர்கள்தான். பத்துவிதமான காதாபாத்திரங்களையும் ஒரே பிரேமிற்குள் கொண்டு வந்து நம்ம வியக்க வைத்தது கிராபிக்ஸ் தொழிநுட்பங்கள்தான். தசாவதாரம் திரைப்படத்தில் சுனாமி வருவது போல் அமைக்கப்பட்ட காட்சியின் பின்ன்ணியில் சுமார் 500 க்கும் மேற்பட்ட கிராபிக்ஸ் கலைஞர்களின் உழைப்பு இருக்கிறது.

ஒரு படைப்பாளியின் சிந்தனைக்கு எல்லையே கிடையாது எனறு சொல்வார்கள். ஆனால் பட்ஜெட் என்று வருகிறபோது, அந்த கற்பனையின் தரத்தை படைப்பாளிகள் குறைத்துக்கொள்ளத்தான் வேண்டி இருக்கும். ஆனால் இன்று, “உங்களின் எல்லா வித கற்பனைக்கும் நாங்கள் உயிர் கொடுக்கிறோம்” என்று படைப்பாளியின் சிந்தனைக்கு உயிர்கொடுப்பவர்கள்தான் கிராபிக்ஸ் கலைஞர்கள்.

ஒரு ப்ளூமேட் பின்னணியில் நாம் எடுத்து கொடுக்கும் ஒரு சின்ன விஷயத்தை, அந்த காட்சி உலகத்தின் எந்த மூலையில் நடைபெறுபோலவும் மாற்றிவிடலாம். அதற்கு ஒரு மிகச்சரியான உதாரணம்தான் "அன்பே ஆருயிரே" திரைப்படத்தில் வரும் "மயிலிறகே மயிலிறகே" பாடல் காட்சி.

பாடல் காட்சியிலும், ஒரு சில சீன்களிலும் மட்டுமே கிராபிக்ஸ் பயன்படுத்திய நமது தமிழ்சினிமாவின் அடுத்தகட்ட வளர்ச்சி பிரமிப்பானது. ஒரு முழு நீள அனிமேஷன் திரைப்படம் நம்மில் இருந்து உருவாகிக்கொண்டு இருக்கிறது என்பது நாமெல்லாம் பெருமைப்பட வேண்டிய விஷயம். "சுல்தான் தி வாரியர்" என்ற அனிமேஷன் திரைப்படம் முழுக்க முழுக்க இந்தியக் கலைஞர்களைக்கொண்டே உலகத்தரத்தில் உருவாகிக்கொண்டு இருக்கிறது.

கிராபிக்ஸில் பல மைல்கற்களை தொட்ட இயக்குனர் ஷங்கர் தன்னுடைய எந்திரன் திரைப்படத்தில் கிராபிக்ஸின் பல பரிணாமங்களை நமக்கு படைக்க விருக்கிறார். ஏனெனில் இது முழுக்க முழுக்க விஞ்ஞானக்கதை. சாதாரணக்கதையிலேயே கிராபிக்ஸில் ஷங்கர் புகுந்து விளையாடுவார். இதில் கேட்க வேண்டுமா என்ன? அதுவும் கதாநாயகன் சூப்பர் ஸ்டார் ரஜினிகாந்த் ஒரு சயிண்டிஸ்ட் என்பதும், இந்தப்படத்தின் பட்ஜெட் 160 கோடி ரூபாய் என்பதும், இதன் மார்க்கெட்டிங் பார்ட்னர் AXN தொலைக்காட்சி என்பதும் நிச்சயமாய் நமக்கு உணர்த்துகின்றன, இது ஒரு கிராஃபிக்ஸ் விஷுவல் விருந்து என்பதை.

கிராபிக்ஸ் தொழிநுட்பத்தை வெறும் ஊறுகாயாக பயன்படுத்தப்படுத்திக்கொண்டிருந்த நமது தமிழ் சினிமா, இன்றைய காலகட்டத்தில் அதை உணவாகவே பயன்படுத்திக கொள்ள தொடங்கி இருக்கிறது. இந்த மாற்றமும், வளர்ச்சியும் வரவேற்கத்தக்கதே. “தொழிநுட்பத்தை பயன்படுத்தாமல் கிடைக்கும் வெற்றி முழுமையான வெற்றி அல்ல” என்று ஸ்டீவன் ஸ்பீஸ்பெர்க் சொன்னதை நாம் இப்போது நிரூபித்துக்கொண்டு இருக்கிறோம்.

“நிறத்தை தேர்ந்தெடுக்கும் உரிமை உன்னிடத்தில் இல்லை” என்று ரஜினி படையப்பா படத்தில் பாடல் பாடி இருப்பார். அதே ரஜினியின் நிறத்தை முற்றிலுமாக மாற்றி, “நான் இப்போ வெள்ளைத்தமிழன்” என்று பாடவைத்தததுதான் கிராஃபிக்ஸின் வெற்றி.

Thursday, October 15, 2009

என் முத்தத்தின் வலி

நம் இடைவெளியை எண்ணி
கட்டிலும் கண்ணீர் விட்டு அழுகிறது.
நம் சண்டையில் கட்டிலை
அழவைக்கலாமா?
சரி.. சரி.. என் கட்டிலுக்காக
என்னை கொஞ்சம் கட்டியணைத்துக்கொள்..



நீ சொல்லவில்லை என்றால் என்ன?
உன் தேகம் தொட்ட மழைத்துளி கூட
சூசகமாய் சொல்லிபோகிறது
உன் காதலை....
உன் துணையை நிச்சயமாய்
நான் தேடவில்லை.
என் நிழலுக்குதான்
ஒரு துணை தேவையாம்.
கொஞ்சம் உதவி செய்.

உனக்குப் பிடித்த
ஆடை எது என்று கேட்டேன்.
சட்டென்று என்னை
அணைத்துக் கொண்டாய்.


"காஃபின்" என்ற விஷப்பொருள்
காஃபியில் கலந்திருக்கிறதாமே..
எனக்கு தெரிந்தவரை
நான் பருகும் காஃபியில்
உன் காதல் மட்டும்தான் கலந்திருக்கிறது.


எடை இழப்பு நிலவில் சாத்தியம்
என்பதை உணர்ந்து கொள்கிறேன்.
உன்னை ஏந்திக்கொள்ளும் போது...
அடிக்கடி என்னை தொடாதே..
தொலைந்து போகும் என்னை
கண்டு பிடிக்க முடியாமல்
திணறுகிறது ராணுவமும்...
என் தலை கோதும்
உன் விரல்களின் அழுத்தத்தில்
தெரிகிறது என் முத்தத்தின் வலி...

Thursday, October 8, 2009

காற்றுக்கு ஆக்சிஜன் தேவை

உலகிலேயே மிகப்பெரியது
கடல் என்று நினைத்திருந்தேன்....
உன் காதலை கண்டு கொள்ளும் வரை




எரிந்தாலும், அணைந்தாலும்
உடனிருக்கும் புகையைப்போல
எப்போதும் உன்னில் இருப்பேன்...

என் விரல் வாகனம்
பயணம் செய்ய ஏற்ற
ஒரே சாலை
உன் இடை மட்டும்தான்....


காற்றுக்கு ஆக்சிஜன் தேவையாம்.
கொஞ்சம் மூச்சுவிடு



தலைகீழாய் நின்றாலும் என்
உலகம் நேராய்தான் இயங்குகிறது
நீ அருகிலிருக்கையில்.....



எத்தனை தடவை உன்னிடம் சொல்வது
வெறும் காலுடன் தரையில் நடக்காதே என்று..
இப்போது பார்....
கற்களிலும் காதல் பூக்கள்
மலர்ந்து கிடப்பதை....


எல்லோருக்கும் இதயம் துடிக்கிறது.
ஆனால் என் இதயம் மட்டும்
துடியாய் துடிக்கிறது,
உன்னைப் பார்ப்பதற்கு....

Monday, October 5, 2009

ரொமான்ஸ் தேசம்

நான் சும்மா இருந்தாலும்
உன் காதல் திசையை நோக்கி
நடக்க செய்யும் என் கால்களின்
அனிச்சை செயலை
என்னவென்று சொல்வது?






சுவர்களை உரசி நிற்காதே..
பார்......
அவைகளும் உன்னை நோக்கி
காதல் கடிதம் நீட்டுவதை..




உன் இதழ்களை பார்க்கையில்
இரும்புகளிலும் காதல் மலர்கிறது.
நான் மட்டும் எம்மாத்திரம்?



என் இதயத்தின் ஒரு பகுதியை
காணவில்லை என்று டாக்டர் சொன்னார்.
அவருக்கு எப்படி தெரியும்,
அந்த காணாமல் போன பகுதிதான்,
என்னுள் நீ நுழைய
நான் உனக்கு
கொடுத்திருக்கும் கடவுச்சீட்டு என்று...


சொர்க்கம் விண்ணில் இருக்கிறது என்று
எந்த பைத்தியக்காரன் சொன்னான்?




சிறு பறவையை கூட எனக்கு
அடைத்து வைக்க பிடிக்காது.
ஆனால் என் அணைப்பில் இருந்து என்றுமே
உனக்கு விடுதலை கிடையாது


நீ தடுமாறுகிறாயோ இல்லையோ,
உன்னால் தண்டவாளங்கள்
தடுமாறி தடம் மாறுகின்றன.
விபத்துகளுக்கு
உன்னை காரணம் காட்டப்போகிறதாம்
ரயில்வேதுறை....

Friday, September 18, 2009

Choooooo. Chweeeeet காதல் கவிதைகள் - 2



நேற்று பத்து நிமிடம்
தாமதமாய் வந்தேன் என்பதற்காக
நீ கொடுத்த இந்த தண்டனை
மிகக்கொடியது....
இப்போதாவது இந்த உலகம்
புரிந்து கொள்ளட்டும்
நீ எவ்வளவு பெரிய
கொடுமைக்காரி என்பதை.......





பூக்களிடம் சண்டையிட்டு
முட்கள் ஆனந்தமாய் தோற்கும்
அதிசய இடம் இது



எனக்கெதிராய் நீ
கத்தி பிடித்தால் கூட பரவாயில்லை.
சமாளித்துவிடுவேன்.
ஆனால் கட்டிப்பிடித்தல் என்ற ஆயுதத்தை
வைத்துக்கொண்டு நிற்கிறாயே.
இனி என்ன செய்ய முடியும் என்னால்?


நீ சூடும் மலரில் அனைவருக்கும்
கலர் மட்டும்தான் தெரியும்.
எனக்கு மட்டும்தான்
அதில் காதல் தெரியும்.




விழி வழியே மட்டுமின்றி
விரல் வழியேயும்
காதல் மின்சாரத்தை கடத்தும்
அதிசய மின் கடத்தி நீ




நான் இறந்துவிட்டால்
என்னை அள்ளி எடுத்து உன்
கழுத்தின் இடையே புதைத்துக்கொள்..
உடனே உயிர் பெற்றுவிடுவேன்.

Tuesday, September 15, 2009

அட்டகாசமான காமெடி

சமீபத்தில் "You-Tube"ல் உலவிக் கொண்டிருந்த போது, "கலக்கப்போவது யாரு" நிகழ்ச்சியின் ஃபைனல்ஸ் பார்க்க நேர்ந்தது. அதில் ஆதவன் உண்மையிலேயே கலக்கி எடுத்து இருந்தார். அட்டகாசமாக இருந்தது. இதில் குறிப்பாக வைரமுத்து போலவும், அதற்கு பாக்யராஜ் கொடுப்பது போல் வரும் ரியாக்ஷனும் வெகு அருமை. அந்த காமெடியை விட உமா ரியாஸ் அதற்கு விழுந்து விழுந்து சிரிப்பது ஹைலைட். அந்த வீடியோவை உங்களுக்காக கீழே கொடுத்துள்ளேன். பார்த்து சிரியுங்கள்...



இந்தக் காமெடி உங்களுக்கு பிடித்திருந்தால் மறக்காமல் பின்னூட்டமிடவும்.

Wednesday, September 9, 2009

கோகுலம் கதிரில் எனது பதிவு

சமீபத்தில் நான் எழுதிய
தழுவி எடுக்கப்பட்ட திரைப்படங்கள் என்ற பதிவும்
காதலன் காதலியிடம் கேட்க விரும்பும் கேள்விகள் என்ற பதிவும்
தினத்தந்தி கோகுலம் கதிர் புத்தகத்தில் வெளியிடப்பட்டுள்ளன.




இந்த இரண்டாவது பதிவை யூத்ஃபுல் விகடனில் வெளியிட்ட விகடன் குழுமத்திற்கும் எனது நன்றிகள்


ஆதரவளித்த அத்தனை ரசிகர்களுக்கும், தினத்தந்தி குழுவிற்கும் எனது நன்றிகள்

Monday, September 7, 2009

பெண்களிடம் ஆண்கள் நல்ல பெயர் வாங்க ஐடியாக்கள்


ஆண்கள் என்ன செய்தாலும் பெண்களிடம் நல்ல பெயர் வாங்க முடிவதில்லை. எப்போது பார்த்தாலும் சண்டைகள் மட்டுமே. இந்த பிரச்சனை தீர சில ஐடியாக்கள இங்கே உங்களுக்கு....

1.காலையில் எழுந்தவுடன் ஹாய்.. குட் மார்னிங்' ன்னு ஒரு SMS அனுப்பணும். உன் குரலை கேட்டாத்தான் இன்னைக்கு பொழுதே நல்லபடியா விடியுதுன்னு ஒரு அப்பட்டமான பொய்யை அவிழ்த்து விடணும் (ஒரு ரூபாய் செலவுதான். என்னங்க பண்றது? பண்ணித்தான் ஆகணும்.) இதே விஷயத்தை ராத்திரி தூங்குறதுக்கு முன்னாடியும் நீங்க செஞ்சாகணும்..

2. அவங்களைப் பார்க்க போறதுக்கு முன்னாடி உங்க செல் ஃபோனோட ஸ்கிரீன் சேவர்'ல அவங்களோட புகைப்படத்தை கண்டிப்பா வெச்சுக்கணும். (எப்பவும் உன் முகத்தையே பார்த்துகிட்டே இருக்கணும்'ன்னுதான் இந்த மாதிரி வெச்சிருக்கேன்னு சொல்லுங்க. இதுலையே அவங்க க்ளீன் போல்ட் )

3. அவங்க பேரோட முதல் எழுத்தை பைக் கீ- செயின்'ல தொங்க விட்டுக்குங்க. எப்பவும் நீ என் கூடவே இருக்கணும்'ன்னுதான் இந்த மாதிரி செய்யுறேன்னு ஒரு பிட்டை விடுங்க. அப்புறம் பாருங்க...

4. சினிமாவுக்கு கூட்டிட்டு போனீங்கன்னா, படத்தை பார்க்கறீங்களோ இல்லையோ கண்டிப்பா ஐந்து நிமிஷத்துக்கு ஒரு வாட்டி அவங்களை திரும்பி திரும்பி பார்க்கணும். எதுக்கு என்னையே பார்க்குறீங்கன்னு கேட்பாங்க. உன்னைப் பார்க்கும் போது இருக்கிற சுவாரஸ்யம் படம் பார்க்கும் போது இல்லைன்னு நீங்க சொல்லணும். (வேற வழி இல்லைங்க. இந்த மாதிரி எல்லாம் நாம டயலாக் விடணும்'ன்னு அவங்க எதிர்பார்ப்பாங்க)

5. அவங்க பேர்ல நிச்சயம் ஏதாவது தமிழ் பாட்டு வந்திருக்கும். அந்த பாட்டை எப்படியாவது தேடி கண்டுபிடிச்சு ரிங்டோனா வெச்சுக்குங்க. அவங்க உங்ககிட்ட சண்டை போடும்போது, உங்க ஃபிரண்டைவிட்டு உங்க நம்பருக்கு கால் பண்ண சொல்லுங்க. அந்த பாட்டு வந்த உடனே அவங்களை பாருங்க. சண்டை எல்லாம் எங்கே போகுதுன்னே தெரியாது.

6. கவிதைங்கிற பேர்ல எதையாவது நீங்க கிரீட்டிங் கார்ட்ல கிறுக்கிக் கொடுத்தே ஆகணும். அந்த கவிதைகள்'ல வானம், கடல், குயில், தேவதை, மயில், போன்ற வார்த்தைகள் கண்டிப்பா இருந்தே ஆகணும்.

7. "நீ ரொம்ப அழகா இருக்கே"ங்கிற அகில உலக பொய்யை ஒரு நாளைக்கு ஐந்து வாட்டியாவது நீங்க சொல்லியே ஆகணும். (இதுக்கு நீங்க கடவுள்கிட்ட தனியா மன்னிப்பு கேட்டுக்குங்க)

8. ஹோட்டலுக்கு கூட்டிட்டு போனீங்கன்னா ஃபர்ஸ்ட் நீங்க ஆர்டர் பண்ணக்கூடாது. மெனு கார்டை அவங்க கையில கொடுத்து, அவங்களைத்தான் ஆர்டர் பண்ண சொல்லணும். புரியுதா? (பெண்களோட உணர்வுகளுக்கு நீங்க மதிப்பு கொடுக்குறவர்'ன்னு அவங்களுக்கு தெரியணும் இல்லை. அதுக்குத்தான்)

9. அவங்க எப்படித்தான் ட்ரஸ் பண்ணாலும், " இந்த ட்ரஸ்'ல நீ தேவதை மாதிரி இருக்கேன்னு மனசாட்சியை கழட்டி வெச்சிட்டு பொய் சொல்லணும்". (ராத்திரியில நீங்க தூங்கும் போது தேவதைங்க உங்க கண்ணை குத்தும். சமாளியுங்க)


10. ரொம்ப ரொம்ப முக்கியமான விஷயம். அவங்க தோழிங்ககிட்ட பேசும்போது ரொம்ப ஜாக்கிரதையா இருக்கணும். அவங்க தோழிங்களை நீங்க கண்டுக்காத மாதிரியே இருக்கணும். ஏன்னா பல பிரச்சனைகளோட தொடக்கம் இங்கே இருந்துதான் ஆரம்பிக்குது.

இந்த விஷயங்களை எல்லாம் கடைபிடிச்சு பாருங்க. உங்க காதலி உங்களை தலையில தூக்கி வெச்சு கொண்டாடுவாங்க.

Friday, August 21, 2009

Choooo. Chweeeeet காதல் கவிதைகள்

"கல்லும் முள்ளும் காலுக்கு மெத்தை"
என்ற பாடலை கேட்கையில் சிரித்து கொள்வேன்.
அது எப்படி கற்கள் காலுக்கு மெத்தையாகும் என்று?..
உன்னுடன் ரயில்வே தண்டவாளத்தில்
நடந்து செல்கையில்தான் அந்த பாடல்
எந்த அளவிற்கு உண்மை என்று உணர்கிறேன்....



தயவு செய்து இவ்வளவு அருகில்
என்னிடம் வராதே. அப்புறம்
"ச்சீ.. போடா... நீ ரொம்ப கெட்ட பையன்" என்று
நீ என்னை திட்டினால்
அதற்கு நான் பொறுப்பல்ல....



நான் உனக்கு
என்ன பரிசு கொடுத்தாலும்
அது அத்தனையிலும்
என் காதல் மட்டுமே நிரம்பி இருக்கும்


எப்போதோ வெட்டி எடுக்கப்பட்ட
மரத்துண்டிலிருந்தும் பூக்கள் பூக்கிறது,
நீ அதை கட்டிப் பிடித்து நிற்கையில்....


நீ எனக்கு கொடுக்கும் பறக்கும் முத்தத்தில்
கலந்திருக்கும் காற்றை மட்டுமல்ல
காதலையும் என்னால் மட்டுமே
உணர முடியும்.


என்னை கட்டிப்பிடித்து நடக்கும் போது
ஏன் தள்ளாடுகிறாய்? என்று கேட்கிறாய்.
நீ என்றைக்காவாது மது அருந்தி, நடந்து பார்...
பிறகு தெரியும்.


யார் உன்னை காயப்படுத்தினாலும்
உன் கண்ணில் இருந்து கண்ணீர்தான் வழியும்.
ஆனால் நான் உன்னை
சிறிதாக காயப்படுத்தினாலும்
உன் இதயத்திலிருந்து ரத்தமே வழிகிறதே..
அட... அந்த அளவிற்கா என்னை காதலிக்கிறாய்?

இதையும் படியுங்கள்